Сёння працоўны дзень намесніка старшыні Гомельскага аблвыканкама Андрэя Бараноўскага пачаўся з прамой тэлефоннай лініі і прыёму грамадзян у Чачэрску

З пытаннямі да намесніка губернатара звярнуліся двое чачаран.

Выбоіны, напоўненыя брудам, на дарозе па вуліцы Калгасная Чачэрска сталі падставай для звароту да прадстаўніка вобласці. Пытанне асфальтавання дарожнага палатна ўзняў мужчына, які пражывае на Калгаснай.

Ён растлумачыў, што пасля работ па замене вадаправоднай сеткі дарога прыйшла ў жудасны стан. Андрэй Бараноўскі адзначыў, што асфальтавання на гэтым участку пакуль не прадбачыцца. Але якасна правесці кладку пясчана-жвіровай сумессю даручана кіраўніцтву камунальнай і дарожнай службаў. 

«Рамонт павінен прайсці сумеснымі сіламі КЖУП і ДЭУ. Да работ неабходна прыступіць у бліжэйшы час, не адкладаючы іх на вясну», - даў дакладнае даручэнне Андрэй Бараноўскі. Са скаргай аб праведзеным капрамонце ў доме №19 па вуліцы Ульянава ў Чачэрску звярнулася пажылая жанчына. Размова аб няякаснай рабоце. «Спецыялісты з вобласці выедуць для маніторынгу дома. Калі спатрэбіцца выканаць дадатковыя віды работ, іх зробяць», - рэзюмаваў Андрэй Бараноўскі.